A chegada dun grupo de voluntarios da Asociación para a Recuperación da Memoria Histórica para escavar o antigo Parque da cidade, onde se cre que están os restos dun fusilado pouco despois da Guerra Civil, desencadeará un lote de sorpresas, que saldarán débedas pasadas e avivecerán vellas historias adormecidas.
Novela de plena actualidade, na que se quere facer xustiza e homenaxear a persoas que pagaron coa vida a defensa dos seus ideais.

¡Maldito DNI! é a historia dunha decisión de morrer legalmente e así vivir á marxe da burocracia moderna. O seu desexo parece ben doado nun principio, mais axiña Olimpio Montes comprenderá que non é tan sinxelo vivir indocumentado nun mundo controlado pola información. ¡Maldito DNI!, novela moi divertida, ás veces desternillante, mantén ó lector atrapado polas situacións disparatadas, pero sempre verosímiles, que vai tecendo un home do noso tempo que pretende acometer unha loita individual contra a sociedade burocratizada na que vive, onde é moi difícil substraerse ó control que o estado realiza sobre tódolos seus cidadáns.

O feito insólito da desaparición do personaxe principal do cadro "A Fragua de Vulcano" de Velázquez é o punto de partida. En efecto, durante unha exposición itinerante do devandito pintor sevillano que ten como primeiro destino a cidade de Faro (na Coruña), no mesmo intre da inauguración, descóbrese que falta o deus Apolo. Que puido suceder? Onde se meteu o atractivo deus? O detective Sito Pescudo ponse en marcha! O divino habitante do Olimpo aproveitará a ocasión para acudir aos diversos lugares e centros de lecer preferidos polos humanos. Para iso é un Deus!

Historia policial e de humor que prende o interese do lector desde a primeira páxina.